Ռիլ

Ռիլ (անգլ. reel)՝ Իռլանդիայում և Շոտլանդիայում տարածված ազգային պար, ինչպես նաև դրան ուղեկցող երաժտական ժանր: 

Ռիլը ծագել է 1750-ական թթ-ին, Շոտլանդիայում, իսկ իռլանդացի պարային վարպետները նպաստել են դրա հետագա զարգացմանը: Ըստ գրավոր աղբյուրների՝ ռիլը Շոտլանդիայից Իռլանդիա է «տեղափոխվել» 18-րդ դարում միայն: Այնուամենայիվ, այն հավասարապես համարվում է թե՛ շոտլանդացիների, թե՛ իռլանդացիների ամենահայտնի ազգային պարերից մեկը: 

Իր բնույթով ռիլն, այսպես կոչված, «վազող» պար է՝ կապված դրա երաժշտության արագ տեմպի հետ (2/2 կամ 4/4 չափով): Մինչև 20-րդ դարի կեսերը տարբերակվում էին ռիլի մելոդիկ՝ սինգլ ռիլ (single reel) և պարային՝ դաբլ ռիլ (double reel) տարատեսակները, որոնցից առաջինն ավելի բարդ ու դանդաղ բնույթ ուներ: Հետագայում, սակայն, դրանց միջև տարբերակումն աստիճանաբար վերանում է: 

Ռիլը կարելի է կատարել և՛ փափուկ կոշիկերով, և՛ կոպիտ: Առաջինի դեպքում պարը ստանում է «թեթև ռիլ» (light reel) անվանումը, իսկ երկրորդի ժամանակ՝ «եռակի ռիլ» (treble reel): 

Շոտլանդական ռիլը սովորաբար կատարվում է զույգով, իսկ ռիլի անգլիական տարատեսակը կարող են պարել միանգամից 6 մարդ: 

Ոտքերի արագ և ռիթմիկ հարվածներով և թատերական շարժումներով այս պարը լայն ճանաչում ունի ամբողջ աշխարհում, թեպետ այն չի մտնում ժամանակակից պարային մրցութային ծրագրերի մեջ: Ռիլը համաշխարհային ճանաչում է ձեռք բերում հատկապես Իռլանդական ազգային ֆոլկ թատրոնի գործունեության շնորհիվ: Ներկայումս ռիլը կատարվում է հիմնականում իռլանդական ազգային ներկայացումների շրջանակներում: