Օդրի Հեփբրն

Օդրի Հեփբրն (Օդրի Քեթլին Ռասթոնը, 1929-1993թթ.)` Հոլիվուդի բոլոր ժամանակների ամենահայտնի ու սիրված դերասանուհիներից մեկը, ով Ամերիկյան կինոարվեստի ինստիտուտի կողմից կազմված «Ամերիկյան կինոյի մեծագույն դերասանուհիների» շարքում արժանացել է 3-րդ հորիզոնականին՝ զիջելով միայն Քեթրին Հեփբրնին ու Բետտ Դեյվիսին: 

      Օդրին ծնվել է 1929թ. Բրյուսելում, անգլիացի Ջոզեֆ Վիկտոր Ռասթոն Հեփբրնի և ազնվական ծագմամբ հոլանդուհի Էլլա վան Հեեմստրայի ընտանիքում: Էլլան առաջին ամուսնությունից երկու որդի ուներ, իսկ Ջոզեֆը բացի Օդրիից այլ զավակ չուներ: Մայրը խիստ կին էր, իսկ հայրն ավելի սրտաբաց էր, այդ պատճառով Օդրին վերջինիս կողքին իրեն ավելի հանգիստ ու թեթև էր զգում: Այնուամենայնիվ, երկուսն էլ «Ֆաշիստների բրիտական միության» անդամ էին, հայրը գերմանական նացիոնալիզմի հավատարիմ գաղափարակից էր: Հետագայում դերասանուհին նշել է, որ սա նրա կյանքի ամենատհաճ փաստերից է: 1935թ. Օդրիի ծնողներն ամուսնալուծվում են այն բանից հետո, երբ Էլլան տեղեկանում է Ջոզեֆի և երեխաների դայակի սիրավեպի մասին:  

    Այս դեպքերից հետո հայրը հեռանում է ընտանիքից ու տեղափոխվում է Լոնդոն: Շատ տարիներ անց, 1960-ականներին, Հեփբրնը «Կարմիր Խաչի» օգնությամբ գտնում է հորը Դուբլինում և մինչև կյանքի վերջ նյութապես ապահովում է նրան: 

Օդրին «Նախաճաշ Տիֆանիի մոտ» ֆիլմում

    1937թ. Օդրին մոր հետ տեղափոխվում են Քենթ (Անգլիա), որտեղ աղջիկը սկսում է հաճախել ընդամենը 14 աշակերտ ունեցող փոքրիկ մասնավոր դպրոց: 1939թ. Գերմանիան պատերազմ է հայտարարում Անգլիային, և նրանք տեղափոխվում են Արհնեմ. Էլլան հույս ուներ, որ Հոլանդիան չեզոք դիրք կընդունի պատերազմական տարիներին ու հեռու կմնա բուն ռազմական գործողություններից:1939-45թթ. Օդրին սովորում է Արհնեմի կոնսերվատորիայում` զուգահեռ զբաղվելով նաև բալետով (դեռ 5 տարեկան հասակում նա մասնակցել էր բալետային մի ներկայացման): 1940թ, երբ գերմանացիները պաշարում են Հոլանդիան,  Օդրին ստիպված է լինում Էդդա վան Հեեմստրա անունով հանդես գալ, քանի որ «անգլիական հնչողությամբ» անունները կարող էին վտանգավոր լինել նացիստական Գերմանիայի պաշարման ընթացքում: 

Մել Ֆեռերի հետ

 1944թ. Օդրին արդեն բալետի պրոֆեսիոնալ պարուհի էր: Նա գաղտնի ելույթներ էր ունենում՝ նացիստների դեմ համընդհանուր պայքարի համար գումար կուտակելու նպատակով: Այդ ծանր ժամանակներում, երբ մարդիկ սովամահ ու ցրտահար էին լինում փողոցներում, Օդրին մասնակցում էր բերագործական գործունեության, կերակւոր էր պատրաստում ու բաժանում մարդկանց: Այդ ընթացքում ներքին բոլոր անհանգստությունները Օդրին հանձնում էր թղթին, ազատ ժամանակի մեծ մասը նա նվիրում էր նկարչությանը:

Պատերազմի ավարտից հետո` 1945թ., Օդրին ու Էլլան տեղափոխվում են Ամստերդամ, որտեղ Հոլիվուդի ապագա աստղը շարունակում է զբաղվել բալետով` զուգահեռ աշխատելով նաև որպես մոդել: 1948թ. Հեփբրնը առաջին անգամ հայտնվում է կինոէկրանին` ինքնաթիռի ուղեկցորդուհու էպիզոդիկ դերով: Շուտով Օդրին տեղեկանում է, որ իր թույլ օրգանզիմի պատճառով (պատերազմի տարիներին շարունակ վատ սննդի արդյունք) բալետի իրական աստղ դառնալու հավանականությունը փոքր է, ինչքան էլ տաղանդը մեծ լինի: Արդյունքում Օդրին որոշում է դերասանուհի դառնալ ու շտապ աշխատանք գտնել, քանի որ մորն օգնելու ու ընտանիքի հոգսը կիսելու կարիք ուներ: Շուտով նա հնարավորություն է ստանում մասնակցել թատերական մի քանի երաժշտական ներկայացումների և էպիզոդիկ դերեր է ստանում մի քանի ֆիլմերում:

Օդրին` արքայադուստր

Աննայի դերում

Նրա առաջին լուրջ դերը «Գաղտնի մարդիկ» (1952թ.) ֆիլմում մարմնավորած բալետի պարուհու կերպարն էր, որտեղ դերասանուհին հնարավորություն է ստանում ցուցադրել նաև իր պարային հմտությունները: Շուտով Հեփբրնը ստանում է իր առաջին գլխավոր դերը կինոյում. 1953թ. նկարահանված «Հռոմեական արձակուրդները», որտեղ դերասանուհին մարմնավորում է արքայադուստր Աննայի կերպարը, իրական փառք են բերում դերասանուհուն: Պատահական չէ, որ մինչ օրս էլ այս ֆիլմը Հին Հոլիվուդի ամենասիրված գործերից մեկն է: Բազմաթիվ մրցանակների հետ մեկտեղ դերասանուհին այս դերի համար արժանանում է «Օսկարի» արձանիկի «Կնոջ լավագույն դերակատարում» անվանակարգում: Բնականաբար, այս իրադարձությունից հետո Օդրրիի մասնակցությամբ ֆիլմերը մեծ հաջողություն են ունենում և դերասանուհու փառքն ու ճանաչումը գնալով մեծանում է («Սաբրինա», 1954թ., «Պատերազմ և Խաղաղություն», 1956թ., «Զվարճալի դեմք», 1957թ., «Նախաճաշ Տիֆանիի մոտ», 1961թ.): Հեփբրնը նկարահանվում էր ժամանակի ամենահայտնի դերասանների կողքին` Գրեգորի Պեկ, Համֆրի Բոգարտ, Ֆրեդ Ասթեր, էնթոնի Փերքինս, Քերի Գրանտ, Մել Ֆեռեր:  

Օդրին, Մելն ու նրանց որդին
Անդրեա Դոտտիի հետ

Վերջինս հետագայում դառնում է Օդրիի ամուսինը: Նրանց որդին` Շոնը, այժմ գլխավորում է «Օդրի Հեփբրն» հիմնադրամի գործունեությունը: 1968թ. դեկտեմբերին`14 տարվա համատեղ կյանքից հետո, զույգն ամուսնալուծվում է: 1969թ. Օդրին ամուսնանում է իտալացի բժիշկ-հոգեբան Անդրեա Դոտտիի հետ: 39-ամյա դերասանուհին շատ էր ցանկանում ևս մեկ երեխա ունենալ, այդ պատճառով ժամանակավորապես թողնում է աշխատանքն ու կենտրոնանում իր նորաստեղծ ընտանիքի վրա: 1970թ. լույս աշխարհ է գալիս նրանց որդին` Լուկա Դոտիին: Անդրեան լավ հայր ու հոգատար ամուսին էր, սակայն ժամանակ առ ժամանակ սիրային արկածներ էր ունենում: Օդրին իր հերթին սիրային կապի մեջ է մտնում դերասան Բիլ Գազարայի հետ: 1982թ. Հեփբրն ու Դոտտին ամուսնալուծվում են: 1980թ.-ից մինչև կյանքի վերջ Օդրին ապրում է դանիացի դերասան Ռոբերտ Ուոլդերսի հետ: Հետագայում դերասանուհին նշել է, որ Ուոլդերսի հետ ապրած տարիները լավագույնն են եղել նրա կյանքում: Կյանքի վերջին տարիներին Օդրին չափազանց ակտիվ գրաֆիկ էր վարում. ՅՈՒՆԻՍԵՖ-ին աշխատակցելն ու Բարի կամքի դեսպան լինելն արդեն իսկ մեծ ծանրաբեռնվածություն էր նրա համար:

Անդրեա Դոտտի հետ

Բազմաթիվ ճանապարհորդությունների արդյունքում դերասանուհին բոլորովին հյուծվել էր, և ակնհայտորեն առողջական խնդիրներ ուներ: 1992թ. Սոմալի և Քենիա ուղևորությունները վերջինը դարձան նրա համար. ճանապարհին դերասանուհին որովայնի հատվածում սուր ցավեր է զգում, բայց աֆրիկացի բժիշկները ոչնչով չէին կարող օգնել Օդրիին: Ենթադրելով, որ խոսքը լուրջ հիվանդության մասին է, Հեփբրնին խորհուրդ են տալիս դադարեցնել ուղևորությունը, բայց վերջինս հրաժարվում է այդ գաղափարից: Նույն թվականի հոկտեմբերին Օդրին ու Ռոբերտը մեկնում են Լոս Անջելես` տեղեկանալով, որ դերասանուհին հաստ աղիքում ուռուցք ունի: 1993թ. հունվարի 20-ին, 63 տարեկան հասակում Հոլիվուդի անմար աստղերից մեկը մահանում է: Նույն օրը Էլիզաբեթ Թեյլորն ասում է. «Աստված պետք է որ շատ գոհ լինի իր կողքին նման հրեշտակ ունենալու կապակցությամբ»: